職場上 5 個你必須知道的發問技巧

公司開會最令人討厭的地方，除了是被是非精卸膊怪廢柴同學會浪費寶貴青春外，就是你的問題不是被扭曲，就是開完三個鐘會仍無法得到有幫助的資料。你可能會唔 Like，不過在溝通學的角度，當你預算要溝通的訊息不能正確傳達至對方的時候，問題其實出在你身上。留意以下幾點，在發問或提出要求時大概可以避免被遊花園！

諗過先問
開會前，列出你想問的問題及每個有可能的 follow up question。重看問題一次，問自己，你問這條問題的目的是甚麼？
如果問題只為曲線 show off 你有做嘢，其他人無做嘢可以慳返。
如果問題只為曲線指出別人／別部門的錯失，更可以慳返。
你懂的！

點解問／點樣問
列出問題後，重看一次：你想從這條問題得到怎樣的資料？對是日議題（強調，「 是日 」）或幫助你或部門的工作有甚麼幫助？你會怎樣 structure 這條問題才能清晰令聽者明白你想要怎樣的資料？
例如：你想知道關於機鐵大堂廣告的宣傳效力，你不應該問：咁响機鐵大堂落廣告有幾得？
很大機你會得到的答案是：好好㗎，如果唔係唔會咁多人都落啦！
比較清晰的問題：有甚麼官方數據證明 XYZ （產品類別） 在機鐵大堂廣告 campaign 後的 ROI 如何？
Got it?
很多時你得到 hea 的答案是因為你的問題目標和需求不明確。

講人話
要問題易明和易接受，請以對方的語言發問。如上面的問題，是否人人都明白 ROI 的意思？講得多 jargon 係懶勁，不過有可能會無謂地浪費時間！另一個發問技巧是，如果需要用 example 輔助解釋問題，請以對方常接觸的事作例子。
如果你想一個電腦 geek 向你講解新網絡 project 的步驟 ，如果你問：可唔可以好似嗰啲教整 cup cake 嘅書咁，一步步咁講解一次畀我哋知？
大佬，電腦人見過整 cup cake 的書未呢？

一條題目一個答案
咪心急，請一條問題只帶出一個重點答案，這樣不單清晰，亦可避免奸人迴避問題並帶你遊花園。
「  以 （對方）的意見，如果用了黃色做 campaign 主題顏色好唔好呢？ 咩客人會中意？咩客人唔中意？唔中意嗰啲會唔會响 facebook 唱我哋？」
對方能清楚聽完你一共想問幾多問題已經不容易，而在回答和中途討論的過程無離題，無講講下唔知去咗邊的機會就更微！

咪插嘴
請待對方完整回答後才問 follow up question 或者要求 further elaboration。首先中間打岔沒禮貎，二來你沒有耐心聆聽， 有疏忽答案的可能性，後來又追問就尷尬啦！


Writer Profile:
Joven Mak - Professional Trainer/Coach, Writer
由時尚雜誌總編輯小姐蛻變成 Professional Trainer；由原本治理心煩人愛情問題，到覺得針對 career development 和職場智慧培訓一樣令自己熱血沸騰，興奮不已。傳媒細胞仍在血中流，所以樂於繼續偽文青的身分，穿梭各網絡平台，宣傳「 We deserve to be HAPPY 」的生存態度。
Join Joven on Facebook: on.fb.me/1zfG36Y